व्यवसायीलाई हतोत्साहित गरेर मुलुक अघि बढ्न सक्दैन : मुख्यमन्त्री आचार्य

रुपन्देही - लुम्बिनी प्रदेशका मुख्यमन्त्री चेतनारायण आचार्यले व्यवसायीलाई थुनेर र हतोत्साहित गरेर मुलुकको अर्थतन्त्र सुदृढ हुन नसक्ने बताएका छन् ।

निजी क्षेत्रलाई उत्साहित बनाउनुपर्ने बेला संघीय सरकारका गतिविधिका कारण व्यवसायी निरुत्साहित हुने अवस्था सिर्जना भएको मुख्यमन्त्री आचार्यले बताए ।

नेपाल उद्योग वाणिज्य महासंघ लुम्बिनी प्रदेशको चौथो कार्यकारिणी समितिको पदस्थापना कार्यक्रमलाई आइतबार सम्बोधन गर्दै मुख्यमन्त्री आचार्यले निजी क्षेत्र मुलुकको आर्थिक मेरुदण्ड भएकाले त्यसको संरक्षण, प्रवर्द्धन र विकासमा प्रदेश सरकार सधैं साथमा रहने बताए ।

उनले उद्योगी–व्यवसायीका समस्या समाधानका लागि प्रदेश सरकारले सक्रिय भूमिका खेलिरहेको उल्लेख गर्दै उद्योगहरूको लाइन काटिएको विषयमा प्रदेश सरकारले अग्रसरता नलिएको भए समस्या थप जटिल बन्ने अवस्था आउने बताए ।

सातै प्रदेश र प्रधानमन्त्रीसँग छलफल गरेर समस्या समाधान गरिएको स्मरण गर्दै उनले व्यवसायीका समस्याबारे संघीय सरकारसँग निरन्तर संवाद गरिने जानकारी दिए ।

‘व्यवसायीहरुलाई थुनेर, हतोत्साहित गरेर मुलुक अघि बढ्न सक्दैन । बदमासी भएका छन् भने कानुनी रुपमा दण्डित गर्न सकिन्छ । तर, सिंगो व्यवसाय क्षेत्रलाई नै हतोत्साहित बनाउने गरी धरपकड गर्नु मुलुकका लागि राम्रो हुँदैन’, मुख्यमन्त्री आचार्यले भने ।

उनले अहिले नै निजी क्षेत्र आर्थिक दबाबमा रहेको अवस्थामा थप धरपकडको वातावरण बने निजी क्षेत्र नै धरासायी हुने खतरा रहेको उल्लेख गरे । निजी क्षेत्रलाई चलायमान बनाउन नसकिए मुलुकको आर्थिक अवस्था अझ कमजोर बन्ने उनको भनाइ थियो ।

मुख्यमन्त्री आचार्यले प्रदेश सरकारले निजी क्षेत्रको लगानी वृद्धि र व्यवसाय प्रवर्द्धनका लागि नयाँ कार्यक्रम ल्याउने तयारी गरिरहेको जानकारी दिए ।

निजी क्षेत्रसँग छलफल गरेर योजना निर्माण गरिने बताउँदै उनले स्थानीय उत्पादन वृद्धि, उद्यमशीलता प्रवर्द्धन र बजार सुनिश्चितताका लागि सहकार्य गर्न प्रदेश सरकार तयार रहेको स्पष्ट पारे ।

युवालाई उद्यमशीलतामा आकर्षित गर्ने तथा निजी क्षेत्रलाई प्रत्यक्ष सम्बोधन गर्ने कार्यक्रमसमेत प्रदेश सरकारले ल्याउने उनले बताए ।