मधेश तनाव: सात दलीय गठबन्धनले प्रदेश प्रमुखको सर्वदलीय बैठक बहिष्कार गरे

काठमाडौं - मधेश प्रदेश प्रमुखले बोलाएको सर्वदलीय बैठक सात दलीय गठबन्धनले बहिष्कार गरेको छ ।

प्रदेश प्रमुख डा. सुरेन्द्र लाभ कर्णले शनिबार दिउँसो ३ बजेका लागि बैठक आह्वान गरेका थिए ।

सर्वदलीय बैठक नेपाली कांग्रेस, जसपा नेपाल, जनमत पार्टी, माओवादी, लोसपा, एकीकृत समाजवादी र नागरिक उन्मुक्ति पार्टीले बहिस्कार गरेका हुन्।

तत्कालीन मुख्यमन्त्री जितेन्द्र सोनलले विश्वासको मत लिने दिन (कात्तिक २२ गते)देखि सुरु भएको किचलो नयाँ मुख्यमन्त्री, प्रदेश प्रमुख परिवर्तन र दलहरूबीच एकअर्काविरुद्ध आरोप्रत्यारोप हुँदै कारबाहीसम्म पुगेको छ।

प्रदेशसभामा प्रतिनिधित्व गर्ने दलहरू अहिले दुईतिर विभाजित छन्। एकातिर नेकपा एमाले र एक(एक सिट भएका नेपाल संघीय समाजवादी पार्टी तथा राप्रपा छन् भने अर्कातिर सात दलीय गठबन्धन छ।

​बैठकमा मुख्यमन्त्रीसमेत रहेका नेकपा एमाले संसदीय दलको नेता सरोज कुमार यादव सहभागी हुने भएका कारण आफूहरूले बैठक बहिष्कार गरेको सात दलीय गठबन्धन सम्बद्ध दलहरू बताएका छन्।