'देउवा, ओली र प्रचण्डले क्षमायाचनासहित अवकाश लिनुपर्छ'

काठमाडौं - नागरिक अगुवाहरूले प्रमुख दलका नेतृत्वले हालसम्मको अवस्थाको नैतिक जिम्मेवारी लिँदै क्षमायाचनासहित राजीनामा दिएर स्वेच्छिक अवकास लिनुपर्ने बताएका छन्। कुनै दल विशेषको औचित्य र भविष्याका लागि मात्र नभई लोकतन्त्र र दलीय प्रणालीको भविष्यको लागि पनि त्यो आवश्यक रहेको औंल्याएका छन्। 

३० नागरिक अगुवाहरूले संयुक्त अपिल जारी गर्दै कांग्रेस सभापति शेरबहादुर देउवा, नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डले क्षमायचानासहित बिदा हुनुपर्ने बताएका हुन्। 

उनीहरूले भनेका छन्, ‘विघटित प्रतिनिधिसभामा प्रतिनिधित्व गर्ने प्रमुख दलको मूल नेतृत्व (सभापति÷अध्यक्ष) ले हालसम्मको अवस्थाको नैतिक जिम्मेवारी लिँदै क्षमायाचनासहित राजीनामा दिएर स्वेच्छिक अवकाश लिनुपर्छ। यो केवल कुनै दल विशेषको औचित्य र भविष्यका लागि मात्रै होइन, लोकतन्त्र र दलीय प्रणालीको भविष्य तथा दल र दलको नेतृत्वलाई जनताप्रति उत्तरदायी बनाउन राजीनामा र स्वेच्छिक अवकाश अपरिहार्य भएको वास्तविकता पनि स्पष्ट पार्न चाहन्छौं।’ 

नागरिक अगुवाहरूले कुनै ‘यदि वा तर’ नभनि फागुन २१ को चुनावमा सभागी हुन पनि दलहरूलाई आग्रह गरेका छन्। साथै अन्तरिम सरकारलाई पनि उनीहरूले निर्वाचनका लागि अनुकूल र विश्वासनीय वातावरण सिर्जना गर्नेतर्फ ध्यान दिन सुझाव दिएका छन्।  

यसरी विज्ञप्ति जारी गर्नेमा झलक सुवेदी, चन्द्रकिशोर, रजनी ढकाल, उद्धव प्याकुरेल, अर्चना थापा, चरण प्रसाई, मीना पौडेल, इन्द्र अधिकारी, राजाराम गौतम, उत्तमबाबु श्रेष्ठ, दिनेश त्रिपाठी, लोकराज बराल, कसमस विश्वकर्मा, दीपेश घिमिरे, विद्याधर मल्लिक, कृष्ण खनाल, दोभान राई, विनोद सिंजापति, केदारभक्त माथेमा, तारानाथ दाहाल, संगीता लामा, केशव दाहाल, तुलानारायण शाह, सञ्जीव उप्रेती, खगेन्द्र संग्रौला, भोजराज पोखरेल, श्रवण मुकारुङ, गेजा शर्मा वाग्ले, मुमाराम खनाल र युग पाठक छन्।