काठमाडौं - नेपाली कांग्रेसले राष्ट्पति विद्यादेवी भण्डारी र प्रधानमन्त्री केपी शर्मा ओलीलाई महाअभयोग लगाउने तयारी गरेको छ ।

कांग्रेसको शुक्रबार बसेको पदाधिकारी र पूर्वपदाधिकारीको बैठकले अन्य दलसँग छलफल गरेर महाअभियोग लगाउने तयारी गरेको हो ।

बैठकमा सहभागी एक नेताका अनुसार कांग्रेससँग मात्रै महाअभियोग लगाउन पुग्ने सांसद संख्या नभएकाले अन्य दलसँग छलफल गरेर महाअभियोग लगाउने तयारी गरेको छ ।

अन्य दलसँग छलफल गरेर साँझ ५ बजे अघि नै महाअभियोग दर्ता गर्ने बताइएको छ । त्यसका लागि अन्य दलसँगको छलफललाई कांग्रेसले तीव्रता दिएको छ ।

राष्ट्पति भण्डारीले नयाँ सरकार गठनका लागि आज साँझ ५ बजेसम्मको समय दिएकी छिन् ।

प्रधानमन्त्रीले संसदबाट विश्वासको मत नलिइ र राजीनामा नदिई राष्ट्रपतिले संविधानको धारा ७६(५) बमोजिम सरकार गठनको आव्हान गर्नु संविधान विपरित भएको कांग्रेसको ठहर छ ।