काठमाडाैं - नेपाली कांग्रेसका महामन्त्री विश्वप्रकाश शर्माले पार्टी सभापति शेरबहादुर देउवा, एमाले अध्यक्ष केपी ‌ओली र माओवादी अध्यक्ष पुष्पकमल दाहाल प्रचण्डका कारण अहिलेकाे अवस्था बनेकाे आशय व्यक्त गरेका छन्। शनिबार फेसबुकमा भिडिओ सन्देश जारी गर्दै उनले गत असारमै आफूले देउवा, ओली र  प्रचण्डलाई सक्रिय राजनीति छाड्न सुझाव दिए पनि नमानेकाे कुरा स्मरण गरे। 

महामन्त्री शर्माले कांग्रेस, एमाले र माओवादीका नेतृत्वलाई सक्रिय राजनीति छाडेर अभिभावकीय भूमिका खेल्न असार १ गते झापाको धुलावारीबाट दिएकाे सुझाव  अहिले भिडियाे सन्देशमार्फत उल्लेख  गरेका हुन्। उनले भनेका छन्, ‘देउवा, ओली र दाहाललाई सक्रिय राजनीतिबाट सन्यास लिनुस्, अभिभावकीय भूमिका खेल्नुस् भनेको हुँ, असार १ गते धुलावारीको कार्यक्रमबाट। सार्वजनिक रूपमा नेतृत्वको कुरा गर्‍यो भन्ने कतिपय साथीहरूलाई लाग्ला भनेर कांग्रेस केन्द्रीय समिति बैठकमै सभापति देउवालाई अब तपाईं छैंटौं पटक प्रधानमन्त्री बन्न हुँदैन भनेको थिएँ।’

शर्माले राजनीतिमा परिवर्तकाे प्रयास गरे पनि आफूले नसकेकाे स्वीकारे। उनले एक पटक राष्ट्रपति, दुई कार्यकाल प्रधानमन्त्री, तीन पटक मन्त्री र चार पटक सांसद मात्रै हुन पाउने व्यवस्था गर्ने प्रस्ताव पार्टीमा गरेका थिए तर स्वीकृत भएकाे थिए। साेही कुरा स्मरण गर्दै उनले भने, ‘त्यसबेला मेरो यो प्रस्ताव चर्चामा त रह्यो तर पार्टी निर्णय बनाउन सकिनँ ।'