काठमाडौं - चीनको वुहानबाट फैलिएको कोरोना भाइरस (कोडिभ–१९)को प्रकोप संसारभर फैलिएसँगै सरकारले सगरमाथा सम्वाद कार्यक्रम स्थगित गरेको छ ।

जलवायु परिवर्तनबारे विश्वलाई सन्देश दिनेगरी आउने २० चैतदेखि तीन दिन सगरमाथा सम्वाद गर्ने तयारी सरकारले गरेको थियो । थुप्रै देशलाई निमन्त्रणा समेत दिइसकिएको छ । तर, कोरोना भाइरसको प्रकोपका कारण यो कार्यक्रम स्थगित गरिएको परराष्ट्रमन्त्री प्रदीप ज्ञवालीले बताएका छन् ।

सगरमाथा सम्वाद कार्यक्रम स्थगित भएको जानकारी दिन सोमबार पत्रकार सम्मेलन गरिदैछ । सरकारले नेपाल भ्रमण वर्ष–२०२० का कार्यक्रम पनि स्थगित गर्ने तयारी गरेको छ । उद्यपि, औपचारिक घोषणा हुन बाँकी छ ।

प्रधानमन्त्री केपी शर्मा ओलीले भ्रमण वर्ष २०२०को कार्यक्रम सार्ने गरी कार्ययोजना बनाउन सम्बन्धित मन्त्रालयलाई निर्देशन दिएका छन्। भ्रमण वर्ष र सगरमाथा संवादको विषय टुंग्याउन उपप्रधान एवं रक्षामन्त्री ईश्वर पोखरेल नेतृत्वमा समिति बनाइएको छ।

२० लाख पर्यटक भित्र्याउने लक्ष्यसहित घोषणा गरिएको भ्रमण वर्ष कोरोना प्रकोपका कारण प्रभावित बनेको छ । छिमेकी चीन लगायत यूरो र मध्य पूर्वसम्म कोरोना फैलिएको छ । शनिवार नै विदेशमा भ्रमण वर्षको प्रवद्र्धनात्मक कार्यक्रमहरु स्थगित गर्ने निर्णय भइसकेको छ । अतिप्रभावित मुलुकहरुको उडान समेत रोक्ने सरकारले तयारी गरेको छ ।

सरकारले जापान, दक्षिण कोरिया, हङकङ र इरानबाट आउने उडान रोक्ने तयारी गरेको हो ।यस्तै, नेपालले दिँदै आएको अनअराइभल भिसा पनि तत्कालका लागि बन्द गर्न निर्देशन दिइएको छ।