जुम्लामा हिमपात, घर बाहिर ननिस्कन अपिल

जुम्ला - हिउँदे वर्षासँगै जुम्लामा भारी हिमपात भएको छ । शुक्रबार बिहादेखि सुरु हिमपात अझै जारी छ ।

हिमपातका कारण चिसो बढ्नाले जनजीवन प्रभावित भएको छ । चिसोका कारण मानिसहरु घरबार निस्कन सकेका छैनन् । सरकारी कार्यालय, विद्यालय तथा बजार क्षेत्र बन्द प्रायः छन् । चिसोका कारण वृद्धवृद्धा र बालबालिका बढी प्रभावित भएको जिज्ला जनस्वास्थ्य कार्यालय जुम्लाले जनाएको छ ।

यसैबीच स्थानीय प्रशासनले चिसोबाट जोगिन सर्वसाधारणमा अपिल गरेको छ । जिल्ला प्रशासन कार्यालय जुम्लाले एक सूचना जारी गर्दै ज्ेष्ठ नागरिक र बालबालिकालाई अत्यावश्यक कामबाहेक घरबाहिर ननिस्कन भनेको छ ।

यस्तै हिमपातका कारण चिप्लिएर सडक दुर्घटना हुन सक्नेतर्फ सचेत रहन सवारी चालकलाई आग्रह गरिएको छ । प्रशासनले चिसोका कारण आउन सक्ने सम्भावित विपदबाट जोगिन शरीर न्यानो बनाएर बस्न आग्रह गरेको छ ।