सैनिक र प्रहरी श्रीमती संघजस्ता पितृसत्तावादी संस्थाहरु खारेज गर्नुपर्छः नेतृ भुसाल

काठमाडौं - नेपाल कम्युनिस्ट पार्टीकी सांसद पम्फा भुसालले पितृसत्तावादी संस्थाहरुको खारेजीको माग गरेकी छिन् । नेतृ भुसालले सैनिक श्रीमती संघ, नेपाल प्रहरी श्रीमती संघजस्ता श्रीमानको हैसियतको आधारमा निर्माण भएका संस्थाहरु खारेज गर्न माग गरेकी हुन् ।

उनले आइतबार संसदमा विशेष समय लिएर बोल्दै मुलुकबाट सामन्तवादी शासन व्यवस्था अन्त्य भए पनि राज्यका निकायमा अझै यस्ता निकायहरु रहनु दुःखद रहेको धारणा राखिन् ।

उनले भनिन्, ‘‘श्रीमानका आधारमा श्रीमतीले सुविधा लिने, परिवारका नाममा परिवारका सदस्यले सुविधा लिने व्यवस्था अन्त्य गरेर आएको भन्दै उनले हामीले अन्त्य गरेका हौं । राष्ट्रप्रमुख शासन प्रमुखसँग सम्बन्ध गाँसेवापत महाराननी हने उनका छोराछोरी युवराज युवराज्ञी हुने र नागरिकभन्दा माथि हुने व्यवस्था हामीले अन्त्य गरेका हौं ।’

सांसद भुसालले अहिले पनि यो देशमा महत्वपूर्ण निकायमा त्यो परिपाटी विद्यमान रहने अवस्था दुःखद भएको तर्क राखिन् । सैनिक श्रीमती संघ, नेपाल प्रहरी श्रीमती संघ, सशस्त्र प्रहरी श्रीमती संघ, निजामती कर्मचारी श्रीमती संघजस्ता संस्था अहिले पनि क्रियाशील रहनु गणतन्त्रसँग मेल नखाने विषय भएको उनको तर्क थियो ।

‘हिजोको परिवार र वंशवादमा आधारित पितृसत्तात्मक सामन्ती राजतन्त्रात्मक व्यवस्थामा बनेका संस्थाहरु राजतन्त्र अन्त्य भएर गणतन्त्र आएको छ, जनताले निर्वाचित भएका प्रतिनिधि शासकमा बदलिएका छन्,’ उनले भनिन्, ‘राष्ट्रप्रमुख सरकार प्रमुख बनिरहेका छन् । राज्यका महत्वपूर्ण निकायहरु सेना प्रहरी र निजामती प्रशासनमा अहिले पनि त्यसको धङधङी बाँकी छ ।’

त्यस्ता संस्थाहरु राज्यकै बजेटबाट सञ्चालन भइरहेको उल्लेख गर्दै उनले भनिन्, ‘‘गणतन्त्रसँग मेल नखाने, राज्यको स्रोत साधनबाट परिचालन हुने यी सामन्ती पितृसत्तावादी संस्थाको यथासिघ्र खारेज गरियोस् ।’