काठमाडौं - अविरल वर्षासँगै आएको बाढी र पहिरोका कारण सोमबार देशका विभिन्न राजमार्ग तथा सडकखण्डमा यातायात प्रभावित भएको छ ।
नेपाल प्रहरीका अनुसार कतिपय सडक पूर्ण रूपमा अवरुद्ध छन् भने केहीमा निश्चित समयका लागि सवारी आवागमन रोकिएको छ ।
प्रहरीका अनुसार पृथ्वीराजमार्गअन्तर्गत धादिङको कृष्णभिरलगायत विभिन्न स्थानमा पहिरो खसेर सडक अवरुद्ध भएको छ । तनहुँको घाँसीकुवा, मौरीभिर, सेराटार र चुनपहरामा पनि पहिरोका कारण पृथ्वीराजमार्ग दुईतर्फी अवरुद्ध भएको छ ।
बिपी राजमार्गअन्तर्गत काभ्रेको चारसयबेँसी र गिम्दीबेँसीमा पहिरो खसेर सडक अवरुद्ध भएको छ । अरनिको राजमार्गअन्तर्गत काभ्रेको पकुचामा पनि पहिरोका कारण यातायात रोकिएको छ ।
पासाङ ल्हामु राजमार्गअन्तर्गत रसुवा–नुवाकोट खण्ड बाढीका कारण पूर्ण रूपमा अवरुद्ध छ । स्याफ्रुबेशीसम्म पुग्न टोखा–छहरे–विदुर–धुन्चे हुँदै वैकल्पिक सडक प्रयोग गर्न सकिने प्रहरीले जनाएको छ ।
मध्यपहाडी लोकमार्गअन्तर्गत बागलुङ र लमजुङका विभिन्न स्थानमा पहिरोका कारण सडक अवरुद्ध भएको छ । सिद्धार्थ राजमार्गअन्तर्गत पाल्पाको गाईघाट र स्याङ्जाको पुतलीबजारमा पहिरोका कारण सडक बन्द भएको छ ।
त्यस्तै, बेनी–जोमसोम, जोमसोम–कोरोला, चामे–बेंसीसहर, कर्णाली राजमार्ग, कर्णाली करिडोर, महाकाली राजमार्ग, कान्तिलोकपथ, कालिगण्डकी करिडोरलगायत सडकखण्डमा पनि बाढी तथा पहिरोका कारण यातायात प्रभावित भएको छ ।
वर्षाका कारण जोखिम बढेपछि विभिन्न जिल्लामा रातिको समयमा सवारी आवागमनमा रोक लगाइएको छ । प्रहरीले सडकको अवस्था बुझेर मात्र यात्रा गर्न तथा जोखिमयुक्त सडकमा जबर्जस्ती आवागमन नगर्न आग्रह गरेको छ ।
