पूर्णबहादुर खड्काको विज्ञप्तिपछि काँग्रेसले बोलायो अनुशासन समितिको बैठक

काठमाडौं - नेपाली काँग्रेसले केन्द्रीय अनुशासन समितिको बैठक बोलाएको छ। 

पार्टी सचिव दिनेश थापामगरका अनुसार बैठक यही बुधबार बिहान ११ बजे पार्टी मुख्यालय सानेपामा बस्नेछ। यसअघि कार्य बाहक सभापतिको हैसियतमा पूर्णबहादुर खड्काले एक विज्ञप्ति जारी गर्दै १५ औँ महाधिवेशनका लागि वितरण तथा नवीकरण भइसकेका क्रियाशील सदस्यता खारेज गर्ने र पुनः नयाँ सदस्यता लिने निर्णयप्रति असहमति जनाएका छन्। 

उनले कुनै नेताको आवेग वा उत्तेजनामा गरिएको अभिव्यक्तिका आधारमा सदस्यता खारेज गर्न नमिल्ने उल्लेख गर्दै त्यस्ता निर्णयले पार्टी संगठनमा असर पार्न सक्ने बताएका छन्।

विज्ञप्तिमार्फत उनले पार्टीलाई कमजोर बनाउने गतिविधिबाट टाढा रहन सम्बन्धित पक्षलाई सचेत गराएका छन्। 

उक्त अभिव्यक्तिपछि सभापति गगनकुमार थापा पक्षले अनुशासन समितिको बैठक बोलाएको हो । यसैबीच, पार्टीले बुधबार दिउँसो २ बजे केन्द्रीय कार्यसम्पादन समितिको बैठक पनि बोलाएको कार्यवाहक मुख्यसचिव कृष्णप्रसाद दुलालले जानकारी गराएका छन्।

बैठकमा पछिल्ला निर्णय र प्रतिक्रियाहरूले पार्टीभित्रको आन्तरिक व्यवस्थापन, अनुशासन र सदस्यता सम्बन्धी विषयमा छलफल हुनेछ ।