शनिबार सदनबाट नागरिकता विधेयक पास हुन्छ : गृहमन्त्री

काठमाडौं-गृहमन्त्री रमेश लेखकले नेपाल नागरिकता विधेयक असार १४ गतेको प्रतिनिधि सभाबाट पारित हुने बताएका छन् ।

बुधबार सिंहदरबारमा बसेको राज्य व्यवस्था तथा सुशासन समितिको बैठकमा बोल्दै उनले शनिबारको प्रतिनिधिसभाको बैठकमा नागरिकता विधेयक पारित हुने बताएका हुन् ।

विधेयक छिटो पारित गर्नुपर्ने र अड्काएर राख्न नहुने बताउँदै उनले भने–‘मैले पाएको जानकारीअनुसार १४ गते सम्मानित प्रतिनिधि सभामा पेस हुँदैछ । त्यसलाई १४ गते नै पास गर्छौं ।’

चाँडो भन्दा चाँडो नागरिकताको विषयलाई पनि टुंग्याउनु पर्ने भन्दै उनले बैठकमा भने–‘यदी सम्भव हुन्छ भने यो महिनाभित्र यो विधेयकलाई पनि टुंगो लगाऔँ ।’

समितिले छोटो समयमा छलफल गरेर नागरिकता सम्बन्धी विधेयक समितिबाट टुंगोमा पुर्‍याएको बताउँदै १४ गते प्रतिनिधि सभाबाट पारित गर्ने बताएका हुन् ।

सम्भव भए नेपाल प्रहरी सम्बन्धी कानूनलाई संशोधन गर्न बनेको विधेयक पनि असार महिनाभित्रै समितिबाट पारित गरेर सदनमा पेश गर्ने वातावरण बनाइदिन गृहमन्त्री लेखकले आग्रह गरेका छन् ।