.gif)
विराटनगर - सुनसरीको देवानगञ्जमा साउन १० गते भएको हिंसात्मक घटनाबारे छलफल गर्न बसेको सर्वदलीय बैठकले आठबुँदे निर्णय गरेको छ।
कोशी प्रदेश सरकारका मुख्यमन्त्री हिक्मतकुमार कार्कीको अध्यक्षतामा बुधबारबसेको बैठकले सामाजिक सद्भाव, शान्ति–सुरक्षा र साम्प्रदायिक एकता कायम राख्न राहत, सुरक्षा तथा समन्वयका विभिन्न आठबुँदे निर्णय गरेको हो।
बैठकले घटनामा मृत्यु भएका ओमप्रकाश मेहता का परिवारलाई प्रदेश सरकारको तर्फबाट २ लाख रुपैयाँ राहत उपलब्ध गराउने निर्णय गरेको छ। साथै, आगजनीबाट क्षति बेहोरेका परिवार र घाइतेलाई प्रतिपरिवार ५० हजार रुपैयाँका दरले राहत उपलब्ध गराइने भएको छ।
यसैगरी बैठकले पालिका तहमा सर्वदलीय बैठक आयोजना गरी सामाजिक सद्भाव अभिवृद्धिका कार्यक्रम सञ्चालन गर्ने, स्थानीय प्रशासनको समन्वयमा सद्भाव यात्रा र संयुक्त सार्वजनिक अपिल जारी गर्ने निर्णय पनि गरेको छ।
त्यसैगरी, सबै धार्मिक समुदायका संघ–संस्थाले संयुक्त रूपमा सामाजिक सद्भाव कायम गर्न पहल गर्ने, सीमावर्ती क्षेत्रमा सुरक्षा सतर्कता बढाउने तथा घाइतेको उपचार र पीडित परिवारलाई थप राहत उपलब्ध गराउन संघीय सरकारसँग अनुरोध गर्ने निर्णय भएको मुख्यमन्त्री सचिवालयले जनाएको छ ।
त्यस्तै बैठकले अफवाह र उत्तेजनात्मक गतिविधिबाट टाढा रहँदै कानुनी प्रक्रिया र संवादमार्फत समस्याको समाधान खोज्न सबै पक्षलाई आग्रहसमेत गरेको छ।
मुख्यमन्त्रीका प्रेस सल्लाहकार विक्रम लुइँटेलका अनुसार बैठकले प्रभावित क्षेत्रमा सुरक्षा व्यवस्था थप प्रभावकारी बनाउन सम्बन्धित जिल्ला प्रशासन कार्यालयलाई निर्देशन दिएको छ।
