नवनिर्वाचित सांसदलाई शपथका बेला पहिचान झल्किने पोसाकमा उपस्थित हुन निर्देशन

काठमाडौं - सङ्घीय संसद् सचिवालयले प्रतिनिधिसभाका नवनिर्वाचित सदस्यहरूको शपथ ग्रहण कार्यक्रम आगामी चैत १२ गते तय गरेको छ ।

सचिवालयले सूचना जारी गर्दै सो दिन दिउँसो २ः०० बजे शपथ ग्रहण हुने भएकाले सबै सदस्यलाई समयमै उपस्थित हुन आग्रह गरेको छ ।

शपथ ग्रहण कार्यक्रम सिंहदरबारस्थित निर्माणाधीन सङ्घीय संसद् भवनको बहुउद्देश्यीय सभाकक्षमा आयोजना हुनेछ। सचिवालयका अनुसार कार्यक्रम सुरु हुनुभन्दा कम्तीमा २ घण्टा अगावै उपस्थित हुनुपर्नेछ ।

उपस्थित हुँदा निर्वाचन आयोगबाट प्राप्त प्रतिनिधि सभा सदस्य पदको प्रमाणपत्र (सक्कल र प्रतिलिपि), नेपाली नागरिकताको प्रमाणपत्रको प्रतिलिपि र हालसालै खिचिएको दुई प्रति पासपोर्ट साइजको फोटो अनिवार्य ल्याउनुपर्ने सूचनामा उल्लेख छ।

सचिवालयले सदस्यहरूलाई औपचारिक पोसाक वा आफ्नो सांस्कृतिक पहिचान झल्किने राष्ट्रिय पोसाकमा उपस्थित हुन अनुरोध गरेको छ। त्यस्तै, नेपाली भाषाबाहेक आफ्नो मातृभाषामा शपथ लिन चाहने सदस्यहरूका लागि विशेष व्यवस्था गरिएको छ।

यस्ता सदस्यहरूले शपथको ब्यहोरालाई आफ्नो मातृभाषामा अनुवाद गरी सोको प्रतिलिपि शपथ कार्यक्रमभन्दा तीन दिन अगावै संसद् सचिवालयको सांसद सुविधा व्यवस्थापन शाखामा  उपलब्ध गराउनुपर्नेछ।