इरानसँगको युद्ध अन्त्य गर्ने सहमति अन्तिम चरणमा पुगेको ट्रम्पको दाबी

एजेन्सी - अमेरिकी राष्ट्रपति डोनाल्ड ट्रम्पले इरानसँगको युद्ध अन्त्य गर्ने सहमति अन्तिम चरणमा पुगेको दाबी गरेका छन् ।

उनले इरानमाथि गर्ने भनिएको थप सैन्य आक्रमण पनि रोकिएको बताएका हुन् । ह्वाइट हाउसमा सञ्चारकर्मीसँग कुराकानी गर्दै ट्रम्पले सहमतिका लागि इरानले आणविक हतियार निर्माण नगर्ने सुनिश्चितता गर्नुपर्ने समेत दोहोर्‍याउनु भएको बीबीसीले जनाएको छ ।

सहमति सम्बन्धी दस्ताबेजहरू लगभग अन्तिम चरणमा रहेका र छिट्टै औपचारिक हस्ताक्षर हुन सक्ने सम्भावना रहेको ट्रम्पको भनाइ छ । 

यो सहमति भएपछि विश्वकै महत्त्वपूर्ण पेट्रोलियम ढुवानी मार्ग मानिने हर्मुज जलमार्ग पूर्ण रूपमा सञ्चालनमा आउने समेत उनले बताए । तर इरानले भने ट्रम्पको दाबीलाई तत्काल स्वीकार गरेको छैन ।

इरानी परराष्ट्र मन्त्रालयका प्रवक्ता इस्माइल बघाइले अहिलेसम्म कुनै अन्तिम सहमति नभएको बताए । अमेरिकाले वार्ताका क्रममा थप नयाँ तथा अत्यधिक मागहरू अघि सारेको आरोप समेत लगाएको छ ।