काठमाडौं - भारतीय प्रधानमन्त्री नरेन्द्र मोदीले लक डाउनका कारण असुविधा भएको भन्दै जनतासँग माफी मागेका छन्।

आइतबार रेडियो कार्यक्रम 'मनकी बात' मा बोल्दै मोदीले भारतवासीसँग माफी मागेका हुन्। सबैभन्दा पहिला म देशवासीसँग माफी माग्न चाहन्छु। मलाई विश्वास छ तपाईहरूले मलाई क्षमा गरिदिनुहुन्छ। यस्तो निर्णय गर्नुपर्‍यो कि जसका कारण तपाईंहरूलाई समस्या भयो, 'उनले भने, 'गरिब भाइबहिनीहरूसँग पनि क्षमा माग्छु। म तपाईंहरूको समस्या बुझ्छु तर १३० करोड देशवासीलाई बचाउन यसबाहेक अरू कुनै उपाय छैन।'उनले यो भाइरससँग जुध्न सबै एक जुट हुन पर्ने पनि बताए।

उक्त कार्यक्रमका क्रममा मोदीले केही स्वास्थ्य अधिकारीहरूसँग पनि कुराकानी गरेका थिए।भारतमा गत बुधबारदेखि २१ दिनका लागि लक डाउन गरिएको छ। लक डाउनका कारण लाखौं मजदुरले काम गुमाएका छन् भने उनीहरूले घर जाने साधन पनि पाएका छैनन्।

लक डाउनकै बीच भारतमा कोरोना संक्रमितको संख्या भने दिनदिनै बढिरहेको छ। आइतबार दिउँसोसम्म त्यहाँ ९८७ जनामा कोरोना भाइरस देखिएको छ भने २५ जनाको मृत्यु भएको छ।