डडेल्धुरामा जिप दुर्घटना हुँदा चार जनाको मृत्यु

डडेल्धुरा - डडेल्धुरामा जिप दुर्घटना हुँदा चार जनाको मृत्यु भएको छ भने ४ जना घाइते भएका छन्।

जिल्लाको नवदुर्गा गाउँपालिका–५ को चौडको कच्ची सडक खण्डमा आज बिहान से १ ज ७३८ नम्बरको जिप दुर्घटना हुँदा चार जनाको घटनास्थलमै मृत्यु भएको प्रहरीले जनाएको छ।

मृत्यु हुनेमा नवदुर्गा गाउँपालिका -५ का १८ वर्षीय सुरेश साउद, २३ वर्षीय सुरेश पार्की, ४० वर्षीया तारा अवस्थी र ७२ वर्षीया कलावती साउद गरी चार जना रहेका छन् ।

जिल्ला प्रहरी कार्यालय डडेल्धुराका अनुसार डडेल्धुरा सदरमुकामतर्फ आइरहेको जिप दुर्घटनामा परेको हो।

जिप सडकबाट करिब पाँच सय मिटर तल जंगलमा खसेको छ। सो स्थानमा अहिलेसम्म चार जनाको शव फेला परेको जिल्ला प्रहरी कार्यालय डडेल्धुराले जनाएको छ। दुर्घटनाको कारण पनि खुल्न बाँकी रहेको प्रहरीले जनाएको छ ।

यस्तै घाइते हुनेमा नवदुर्गा–५ बस्ने १८ वर्षीया सुशिला विक, चार वर्षीया बालिका प्रतिका पार्की, ४८ वर्षीय चन्द्रबहादुर साउद र जिप चालक ३५ वर्षीय रामबहादुर साउद छन् । उनीहरुमध्ये सुशिला विक र जिप चालक रामबहादुर साउदको अवस्था गम्भीर छ ।