अफगानिस्तानले जित्यो वेष्ट इण्डिजविरुद्धको टी-ट्वान्टी सिरिज

काठमाडौं - वेष्ट इण्डिजविरुद्धको तीन खेलको टी-ट्वान्टी क्रिकेट सिरिज अफगानिस्तानले जितेको छ ।

आइतबार भएको तेस्रो तथा अन्तिम खेलमा वेष्ट इण्डिजलाई २९ रनले पराजित गर्दै अफगानिस्तानले सिरिजमा २(१ को कब्जा जमाएको हो ।

अफगानिस्तानले दिएको १ सय ५७ रनको लक्ष्य पछ्याएको वेष्ट इण्डिज २० ओभरमा ७ विकेट गुमाएर १ सय २७ रनमै समेटियो ।

वेष्ट इण्डिजका लागि साई होपले ५२ रनको अर्धशतकीय इनिङ्स खेले । इभिन लेविसले २४ रन बनाए । वेष्ट इण्डिजलाई सस्तैमा समेट्न अफगानिस्तानका नबिन उल हकले ३ विकेट लिए ।

यस अघि टस जितेर पहिले ब्याटिङ गरेको अफगानिस्तानले २० ओभरमा ८ विकेट गुमाएर १ सय ५६ रन बनाएको थियो ।

अफगानिस्तानका लागि रहमान उल्लाह गुर्बाजले ७९ रनको अर्धशतकीय इनिङ्स खेले । अस्घर अफगानले २४ तथा मोहमद नाबीले १५ रन जोडे ।

वेष्ट इण्डिजका लागि सेल्ड्रोन कोट्रेल, केस्रिक विलियम्स र किमो पाउलले २/२ विकेट लिएका थिए । यस अघि पहिलो टी-ट्वान्टीमा वेष्ट इण्डिजले जित निकालेको थियो भने दोस्रो खेल अफगानिस्तानले जितेको थियो  ।