मंसिर ७ देखि देशव्यापी आन्दोलन थाल्ने दुर्गा प्रसाईँको घोषणा

काठमाडौं - ‘राष्ट्र, राष्ट्रियता, धर्म-संस्कृति र नागरिक बचाऊ’ अभियानका संयोजक दुर्गा प्रसाईंले मंसिर ७ गतेदेखि आन्दोलन गर्ने घोषणा गरेका छन् ।

बुधबार राष्ट्रिय मानव अधिकार आयोगका पदाधिकारीसँगको छलफलपछि सञ्चारकर्मीसँग कुरा गर्दै प्रसाईंले मंसिर ७ गतेदेखि देशव्यापी आन्दोलन गर्ने बताएका हुन् ।

प्रसाईंका अनुसार यो अभियान पूर्व मेचीदेखि पश्चिम महाकालीसम्म, १४ अञ्चल, ७५ वटै जिल्ला र १६५ वटै निर्वाचन क्षेत्रमा हुनेछ।

प्रसाईंले भने- ‘यो दिन दिल्लीमा दलहरू र विद्रोही माओवादीबीच १२ बुँदे सम्झौता भएको थियो। त्यही १२ बुँदे सहमतिका कारण देशमा राजसंस्था गयो, हिन्दु अधिराज्य गयो, र आज नेपाली नागरिक विदेश गएर देश खाली भएको तथा विदेशीहरूको इसारामा एनजीओ र आईएनजीओका सरकारहरू चलेको छ।’

मंसिर ७ गते दिल्लीमा दलहरू र माओवादीबीच १२ बुँदे सम्झौताका कारण मुलुक अप्ठ्यारो अवस्थामा आइपुगेको जिकिर गर्दै उनले मंसिर ७ गतेदेखि नै आन्दोलन सुरू गर्न लागेको बताए ।

उनले सबै नेपाली नागरिकलाई यो व्यवस्था परिवर्तन गर्न आह्वान गर्दै मङ्सिर ७ गतेको आन्दोलनको लागि तयार रहन आग्रह गरे।

उनले आन्दोलन लगभग २० दिनपछि सुरु हुने भएकाले सम्पूर्ण नेपाली नागरिकलाई आवश्यक डिजेल, ग्यास र दैनिक उपभोग्य वस्तुहरू घरमा राख्न सूचित गरेका छन्। । उनले निजामती कर्मचारी र प्रहरीलाई पनि मङ्सिर ७ गतेदेखि बिदा बस्न समेत अनुरोध गरेका छन्।

उनले चैत १५ गतेको घटनामा पनि घुसपैठ भएको दाबी गर्दै आफ्नो अभियानको उद्देश्य कसैको घर जलाउने नभएको स्पष्ट पारे।