काठमाडौं - प्रधानमन्त्री केपी शर्मा ओलीको आगामी बुधबार दोस्रो पटक मिर्गौला प्रत्यारोपण हुने भएको छ ।

त्यसका लागि उनी सोमवार त्रिवि शिक्षण अस्पताल महाराजगञ्ज भर्ना हुँदैछन् । ओलीलाई उनकी भान्जीले मिर्गौला दिने उपचारमा संलग्न एक चिकित्सकले बताए । प्रत्यारोपणअघि उनलाई कुनै समस्या आए मिर्गौला दिन नातिनी र भान्जा पनि तयार छन् ।

दुवै मिर्गौला फेल भएपछि २०६४ सालमा भारतको अपोलो अस्पतालमा ओलीको पहिलो पटक मिर्गौला प्रत्यारोपण गरिएको थियो ।
प्रधानमन्त्री ओलीको मिर्गौला प्रत्यारोपण शिक्षण अस्पतालका युरोलोजी तथा ट्रान्सप्लान्ट सर्जन प्रा।डा। प्रेमराज ज्ञवाली नेतृत्वको टोलीले गर्नेछ । नियमित प्रत्यारोपण गर्ने शिक्षण अस्पतालकै अन्य ४ जना सर्जन पनि टोलीमा सहभागी हुनेछन् ।

ओलीको पहिलो पटकको मिर्गौला प्रत्यारोपण गर्ने भारतीय डाक्टरलाई बोलाउने विषयमा समेत छलफल चलिरहेको छ तर सोमवार मात्रै त्यसको टुंगो लाग्ने स्रोतले जनाएको छ ।

प्रत्यारोपणको तयारीस्वरुप ग्रान्डी अस्पतालमा आइतवार प्रधानमन्त्री ओलीको कोलोनोस्कोपी गरिएको छ । प्रत्यारोपण  गर्नुपूर्व कोलोनोस्कोपी गरिन्छ । यसअघि उनको मुटुको अवस्था हेर्न मनमोहन कार्डियो सेन्टरमा एन्जियोग्राफी गरिएको थियो ।

नयाँ पत्रिका दैनिकबाट