धनगढी - काठमाडौंबाट धनगढीतर्फ आइरहेको  बस बर्दिया राष्ट्रिय निकुञ्जभित्र दुर्घटनामा परेको छ।

आज दिउँसो काठमाडौँबाट धनगढी आइरहेको खप्तड बडीमालिका यातायातको ना ८ ख १९४९ नम्बरको बस कैलालीको चिसापानी पुल नजिकै, बर्दिया राष्ट्रिय निकुञ्ज क्षेत्रभित्र अनियन्त्रित भई दुर्घटनामा परेको हो। 

दुर्घटनामा परेर चालकसहित १८ जना घाइते भएका छन् । जसमध्ये दुई जनाको अवस्था गम्भीर रहेको बताइएको छ।

घाइते मध्ये १६ जनालाई उपचारका लागि लालरत्न अस्पताल लम्की पठाइएको प्रहरीले जनाएको छ । गम्भीर घाइते भएका दुवै जनालाई लालरत्न अस्पताल लम्कीले थप उपचारका लागि नेपालगञ्ज रेफर गरेको छ ।

बस सडकमै पल्टिएकाले उक्त सडकखण्डमा आवतजावत पूर्ण रूपमा अवरुद्ध भएको छ। प्रहरी र सम्बन्धित निकायको टोली घटनास्थलमा पुगेर उद्धार तथा सडक खुलाउने काम जारी राखेको जनाएको छ।