काठमाडौं - नेपाली कांग्रेसका महामन्त्री गगन थापाले काम गर्ने अवसर पाइएन भनेर कांग्रेसले गनगन गर्न नमिल्ने बताएका छन् ।

मीनकुमारी राणाको प्रतीमा अनावरण, पुरस्कार तथा छात्रवृत्ति वितरण समारोहलाई सम्बोधन गर्दै महामन्त्री थापाले सो कुरा बताएका हुन् ।

काम गर्नका लागि छोटै अवधि पनि पर्याप्त हुने उनले बताए । अब कांग्रेस र एमालेले काम गर्ने समय पाइएन भन्न नमिल्ने महामन्त्री थापाको भनाइ छ।

महामन्त्री थापाले भने,‘कांग्रेस र एमालेले २०८४ को निर्वाचनको चर्चा गर्नै मिल्दैन । त्यहाँसम्म पुग्नका लागि अझै तीन वर्ष छ र काम गर्नका लागि यो अवधि पर्याप्त छ । यो अवधिमा काम गर्न सकेनौँ भने अरु कुराको गनगन गर्न पाइँदैन ।’

संघ, प्रदेश र तीन सय ३० पालिकामा कांग्रेस सरकारमा रहेको भन्दै उनले ती सरकारलाई प्रभावकारी बनाउनतिर कांग्रेसको ध्यान जानुपर्ने बताए ।

यस्तो अवस्थामा पनि केही गर्न नसके आफूहरू हुनुको कुनै अर्थ नहुने उनले बताए। जनताले कांग्रेसलाई धेरै दिएको भन्दै महामन्त्री थापाले जनताले दिने कुरामा अब पनि चुक्न नहुने बताए।