काठमाडौं,एजेन्सी - दुबईमा जारी यस सिजनको इन्डियन प्रिमियर लिग (आइपिएल) अन्ततः समाप्त भएको छ । गएराति सम्पन्न भएको फाइनल खेलमा मुम्बई इन्डियन्सले दिल्ली क्यापिटल्सलाई हराउँदै उपाधि जित्न सफल भएको छ । 

दुबई इन्टरनेशनल क्रिकेट मैदानमा सम्पन्न खेलमा मुम्बईले दिल्ली क्यापिटल्सलाई ५ विकेटले पराजित गर्दै पाँचौ पटक आइपिएलको उपाधि जितेको हो ।

दिल्ली क्यापिटल्सले दिएको १५७ रनको लक्ष्य पछाएको मुम्बईले १८.४ ओभरमा ५ विकेट गुमाउदै लक्ष्य पुरा गरेको थियो ।

मुम्बईका लागि कप्तान रोहित शर्माले सर्बाधिक ६८ रन बनाएका थिए । रोहितले ५१ बलमा ५ चौका र ४ छक्का प्रहार गर्दै ६८ रन बनाएका थिए ।

त्यस्तै मुम्बईका लागि इशान किशनले अविजित १९ बलमा ३३ रन बनाए भने क्विन्टन डिककले २० रनको योगदान गरेका थिए । त्यस्तै सूर्यकुमार यादव १९ रन बनाएर रन आउट भएका थिए भने केरन पोलार्ड ९ रन बनाएर आउट भए । त्यस्तै हार्दिक पाण्डेयले ३ रन बनाए भने क्रुनाल पाण्डेयले एक रन बनाए ।

दिल्लीका बलर एनरिच नोर्खियाले २ विकेट लिए भने मार्कोस स्टोइनिस, र कागीसो रबाडाले एक/ एक विकेट लिएका थिए ।  

यसअघि टस जितेर पहिला ब्याटिंग गरेको दिल्लीले २० ओभरमा ७ विकेट गुमाउदै १५६ रन बनाएको हो ।

दिल्लीका लागि कप्तान श्रेयस अय्यरले सर्बाधिक ६५ रन बनाए भने रिषव पन्तले ५६ रनको योगदान दिएका थिए । त्यस्तै शिखर धवन १५ रन बनाएर आउट भए भने मार्कोस स्टोइनिस शुन्यमा, आजिख्य रहाने २ रन बनाएर आउट भएका थिए ।

त्यस्तै शिमरन हेटमेयरले ५ रन बनाए भने अक्सर पटेलले ९ रनको योगदान दिए । मुम्बई इण्डियन्सका बलर ट्रेन्ट बोल्टले ३ विकेट लिए भने नाथन क्ल्टर नीलले २ विकेट लिए । त्यस्तै जयन्त यादवले एक विकेट लिए ।

 अहिलेसम्म १३ औं सिजनमा मुम्बई इन्डियन्स छैठौ पटक फाइनल खेल्दा सर्वाधिक (पाँच) पटक उपाधि जितेको छ । यता पहिलो पटक फाइनलमा पुगेको दिल्ली क्यापिटल्सले भने पहिलो पटक आइपिएलको ट्रफी उचाल्नबाट चुकेको छ ।