शुशान्त सिंहलाई आत्महत्या गर्न बाध्य पारेको भन्दै अदालतमा मुद्दा दर्ता

काठमाडौं - भारतीय चर्चित अभिनेता सुशान्त सिंह राजपूतको आत्महत्या घटनामा नयाँ मोड आएको छ । उनको आत्महत्याका लागि धेरै भारतीयहरूले स्थापित अभिनेताहरूलाई दोष दिएका छन् ।

सँगै उनको आत्महत्या मामिलामा अदालतमा मुद्दा दर्ता भएको छ । उक्त केसमा करन जोहर, संजयलीला भंसाली, सलमान खान, एकता कपूरसमेतलाई प्रतिवादी बनाइएको छ ।

भारतको विहारको मुजफ्फरपुर अदालतमा मुद्दा दर्ता गरिएको हो । भारतीय समाचार एजेन्सी एएनआईले एक ट्वीट गर्दै आइपीसीको धारा ३०६, १०९, ५०४ र ५०६ अन्तर्गत मुद्दा दर्ता गरिएको बताएको छ ।

एएनआईसँग कुराकानी गर्दै वकिल सुधीरकुमार ओझाले भने, ‘मैले दर्ता गराएको आरोपपत्रमा शुशान्तसिंह राजपूतलाई करीब ७ वटा फिल्मबाट हटाइएको विषय उल्लेख छ । उनको आसपास रहनेहरूले उनलाई आत्महत्या गर्न बाध्य पारेका थिए ।’