काठमाडौं,एजेन्सी - बेल्जियम युरोपेली च्याम्पियनसिप २०२० को क्वाटरफाइनलमा प्रवेश गरेको छ । गएराति भएको खेलमा साविक विजेता पोर्चुगललाई १-०ले स्तब्ध पार्दै बेल्जियमले अन्तिम आठमा स्थान पक्का गरेको हो । 

बेल्जियमलाई जित दिलाउन थोर्गन हाजार्डले निर्णायक गोल गरे । खेलको ४२ औं मिनेटमा हाजार्डले थोमस मुनिएरको पासमा बेल्जियमका लागि गोल गरेका थिए । दोस्रो हाफमा सुधारिएको प्रदर्शन गरेपनि पोर्चुगलले खेलमा फर्कन सकेन । 

यस जितसँगै बेल्जियमले क्वाटरफाइनलमा इटालीसँगको भेट पक्का गरेको छ ।  अष्ट्रियालाई अतिरिक्त समयमा २-१ ले हराउँदै इटालीले अन्तिम आठको यात्रा पक्का गरिसकेको छ । पोर्चुगल भने अन्तिम १६ बाटै बाहिरिएको छ ।