काठमाडौं - हङकङमा जारी हङकङ सिक्सेसको क्वाटरफाइनलमा नेपाल श्रीलंकासँग पराजित भएको छ ।

क्वार्टरफाइलनमा श्रीलंकासँग नेपाल ४० रनले पराजित भएको हो। १२४ रनको लक्ष्य पछ्याएको नेपालले निर्धारित छ ओभरमा ६ विकेट गुमाएर ८३ रन मात्रै बनाउन सक्यो ।

नेपालका लागि रसिद खानले सर्वाधिक ५५ रन बनाए भने नारायण जीसीले १३ रनको योगदान दिए । अन्य कुनै ब्याटरले भने दोहोरो अंक छुन सकेनन् ।

टस जितेर फिल्डिङको निर्णय गरेको नेपालका सबै बलर श्रीलंकासामु निरीह साबित भए । प्रतिश जीसीबाहेक अन्य सबै बलर महँगो साबित भएका थिए ।

६ ओभरको प्रतियोगितामा श्रीलंकाले २ विकेटको नोक्सानीमा १ सय २३ रन बनाएको थियो ।

श्रीलंकाका लागि सन्दुन विराक्कोडीले ५०, कप्तान निहुरु मधुशंकाले अविजित ३१ र लाहिरु समाराकुनले २२ रनको योगदान दिएका थिए ।

नेपालका लागि प्रतीश जीसी र नारायण जोशीले १/१ विकेट लिए । यसअघि अस्ट्रेलिया र इंग्ल्यान्डलाई हराउँदै नेपाल समूह विजेता बनेको थियो र क्वाटरफाइनलको यात्रा तय गरेको हो ।