गृहमन्त्रीको राजीनामा माग्दै संसद र सडकमा प्रदर्शन

काठमाडौं - गृहमन्त्री रमेश लेखकको राजीनामा माग गर्दै विपक्ष दलका सासंदहरुले अवरोध गरेपछि संसद स्थगित भएको बेला सडकमा पनि प्रदर्शन सुरु भएको छ ।

भिजिट भिसा प्रकरणमा मुछिएका गृहमन्त्री लेखकको राजिनामा माग गर्दै अखिल क्रान्तिकारी विद्यार्थी संगठनलगायतले विरोध प्रदर्शन गरेका छन् ।

मंगलबार माइतीघरमण्डलमा अखिल क्रान्तिकारी, अखिल समाजवादी, अनेरास्ववियू, युवा संघ नेपाल, योङ कम्युनिष्ट लिग र युवा संगठनले संयुक्त रुपमा प्रदर्शन गर्दै गृहमन्त्री लेखकको राजीनामा माग गरेका हुन् ।

उनीहरूले ‘नालायक गृहमन्त्री राजीनामा दे, भ्रष्ट गृहमन्त्री राजीनामा दे, दलाल सरकार मुर्दावाद, भिजिट भिसा काण्डको निष्पक्ष छानबिन गर’लगायतका नारा लगाएका थिए ।