.gif)
काठमाडौं- भेनेजुएलामा एक मिनेटभन्दा कम समयको अन्तरमा आएका दुई शक्तिशाली भूकम्पले व्यापक जनधनको क्षति पुर्याएपछि देशभर संकटकाल घोषणा गरिएको छ ।
अन्तरिम राष्ट्रपति डेल्सी रोड्रिगेजले राष्ट्रका नाममा सम्बोधन गर्दै उद्धार तथा राहत कार्यलाई तीव्र बनाउन आपत्कालीन अवस्था घोषणा गरेकी हुन् । अमेरिकी भूगर्भ सर्वेक्षण (यूएसजीएस) का अनुसार पहिलो ७.२ म्याग्निच्युडको भूकम्प याराकुई राज्य नजिक २२ किलोमिटर गहिराइमा गएको थियो।त्यसको केवल ३९ सेकेन्डपछि मोरोन क्षेत्रनजिक १० किलोमिटर गहिराइमा ७.५ म्याग्निच्युडको अर्को शक्तिशाली भूकम्प गएको थियो। त्यसयता २० भन्दा बढी पराकम्प महसुस भइसकेका छन्।
यूएसजीएसले यसलाई अत्यन्त उच्च मानवीय क्षति निम्त्याउन सक्ने विपत्ति भन्दै १० हजारभन्दा बढीको मृत्यु हुने सम्भावना ४४ प्रतिशत तथा एक लाखभन्दा बढी मानिसको ज्यान जान सक्ने जोखिम ३० प्रतिशत रहेको प्रारम्भिक प्रक्षेपण सार्वजनिक गरेको छ। यद्यपि, हालसम्म सरकारले आधिकारिक मृतक संख्या सार्वजनिक गरेको छैन।
भूकम्पका कारण राजधानी काराकाससहित ला गुएरा, अरागुआ, काराबोबो र फाल्कोन राज्यहरू सबैभन्दा बढी प्रभावित भएका छन्। धेरै भवन भत्किएका छन्, दर्जनौँ मानिस भग्नावशेषमा फसेका छन् भने उद्धार टोलीहरूले निरन्तर खोज तथा उद्धार अभियान सञ्चालन गरिरहेका छन्। विपत्तिपछि राजधानीको मेट्रो तथा रेल सेवा बन्द गरिएको छ। मुख्य अन्तर्राष्ट्रिय विमानस्थल माइकेटियाको संरचनामा क्षति पुगेपछि उडान सेवा पनि रोकिएको छ।
सरकारले विद्यालय तथा कलेजहरू बन्द गर्दै केही शैक्षिक संस्थालाई अस्थायी आश्रयस्थल र राहत वितरण केन्द्रका रूपमा प्रयोग गर्ने निर्णय गरेको छ। स्वास्थ्यकर्मीहरूलाई तत्काल अस्पतालमा उपस्थित हुन निर्देशन दिइएको छ। यसैबीच, संयुक्त राज्य अमेरिकाले भेनेजुएलालाई खोज तथा उद्धार टोली, चिकित्सा सामग्री र मानवीय सहायता उपलब्ध गराउने घोषणा गरेको छ।
