उत्तर कोरियाका शासक किम जोंग उन गम्भीर बिरामी

काठमाडौं - उत्तर कोरियाली नेता किम जोङ उन गम्भीर बिरामी परेका छन्। अमेरिकी गुप्तचर निकायलाई उद्धृत गर्दै सिएनएनले जनाएअनुसार एउटा शल्यक्रियापछि उनी गम्भीर बिरामी परेका हुन्।

यही अप्रिलमा परेको उनका हजुरबा किम इल सुङको जन्मजयन्ती समारोहमा अनुपस्थित भएपछि किमको स्वास्थ्य खराब बनेको पश्चिमा सञ्चारमाध्यमहरुले अड्कल काटेका थिए। त्यसको चार दिनअघि अर्थात् अप्रिल ११ को सरकारी बैठकमा भने उनी सहभागी थिए। 

यद्यपि, महत्त्वपूर्ण समारोहमा उनको अनुपस्थिति के कारणले भएको हो भन्नेबारेभने यकिन जानकारी आउन सकेको छैन। विगतमा यस्ता समारोहमा उत्तर कोरियाली नेताको अनुपस्थितिले महत्त्वपूर्ण घटनाको संकेत गरेका थिए।

  सन् २००८ मा पनि किम जोङ इल उत्तर कोरियाको ६०औं वार्षिकोत्सवमा अनुपस्थित भएका थिए। पछि उनलाई स्ट्रोक भएको खुलासा भएको थियो।