काठमाडौं,एजेन्सी - युक्रेनमा भएको हमलापछि विश्वभर आक्रोश मच्चिएको छ । युक्रेनको अवस्था झन खराब हुँदै गइरहेको छ । सर्वसाधारणमा यस्तो डरको माहौल छ कि मानिसहरु घर छाडेर मेट्रो मुनि वा भूमिगत ठाउँमा लुकेर बसेका छन् ।

हजारौं मानिस देश छाडेर छिमेकी मुलुकमा शरण लिन पुगेका छन् । यसैबीच युक्रेनमा रुसी आक्रमणपछि धेरै देशले मस्कोमाथि विभिन्न प्रतिबन्ध लगाएका छन् ।

अमेरिका 

शुक्रबार नै अमेरिकी राष्ट्रपति जो बाइडेनले रुसमाथि धेरै प्रतिबन्ध लगाउने घोषणा गरेका थिए । उनले रुसी राष्ट्रपति भ्लादिमिर पुटिन र विदेशमन्त्री सर्गेई लाभरोभमाथि प्रतिबन्ध लगाउने घोषणा गरेका छन् । उनीहरुमाथि अमेरिकामा यात्रा प्रतिबन्ध लगाइनेछ । यसपछि बाइडेनले रुसको प्राविधिक आयातमा बाधा पु¥याउन सक्ने गरी चारवटा रुसी बैंकमाथि प्रतिबन्ध लगाएका छन् । यसले रूसी अर्बपतिहरूलाई असर गर्नेछ। अमेरिकाले रुसको ठूलो ऊर्जा कम्पनी गाजप्रोमसहित १२ कम्पनीलाई प्रतिबन्ध लगाएको छ ।

युरोपेली संघ

युरोपेली संघले पुटिन र लाभरोभलाई पनि प्रतिबन्ध लगाएको छ । यसबाहेक युरोपेली संघका विदेशमन्त्रीहरूको आपतकालीन बैठकमा रुसमाथि धेरै कडा कदम चाल्ने निर्णय गरिएको छ । युरोपेली संघले रुसका विदेश नीति प्रमुख जोसेफ बोरेललाई ‘निर्दयी व्यक्ति’ भन्दै कडा प्रतिबन्ध लगाएको छ । युरोपेली संघले लगाएको प्रतिबन्धका कारण रुसको आर्थिक, ऊर्जा र यातायात क्षेत्र प्रभावित हुनेछन् ।यसबाहेक, रुसी व्यक्तिहरूको इयु बैंकहरूमा पैसा जम्मा गर्ने क्षमता पनि प्रभावित हुनेछ। युरोपेली संघका सबै २७ देशमा धेरै रुसी नागरिकलाई आउन प्रतिबन्ध लगाइनेछ र सम्पत्ति पनि जफत गरिने बताइएको छ ।

बेलायत

बेलायत सरकारले शुक्रबार पुटिन र लाभरोभको सबै सम्पत्ति रोक्का गर्ने र रुसी अर्बपतिको विमानलाई आफ्नो हवाई क्षेत्रमा प्रतिबन्ध लगाउन आदेश दिएको छ। पुटिन र लाभरोभ बाहेक बेलायतमा रहेका धेरै व्यक्तिको सम्पत्ति र बैंक खाता रोक्का गर्ने आदेश पनि दिइएको छ । यसअघि पनि बेलायतले रुस बैंक भिटीबी र रक्षा उत्पादक रोस्टेकको सम्पत्ति रोक्का गरिसकेको छ ।

क्यानडा

पुटिन र लाभरोभमाथि प्रतिबन्धको अतिरिक्त, क्यानडाले रसियालाई द्रुत भुक्तानी प्रणालीबाट बाहिर राखेको छ। यसले रूसलाई व्यापार गर्न गाह्रो बनाउनेछ। क्यानडाले रूसलाई सहयोग गर्ने बेलारुसमाथि पनि धेरै प्रतिबन्धहरू लगाएको छ। क्यानडाले रुसका करिब ६० प्रभावशाली व्यक्ति र बैंकमाथि प्रतिबन्ध लगाएको छ ।