काठमाडौं - २०औँ एसियाली खेलकुदमा सहभागी नेपाली राष्ट्रिय पुरुष क्रिकेट टोली स्वदेश फर्किएको छ ।
नेपाली टोली गएराति जापानको टोकियोबाट काठमाडौं आइपुगेको हो। टोलीलाई नेपाल क्रिकेट संघ (क्यान) का पदाधिकारीले विमानस्थलमा स्वागत गरेका थिए।
नेपालले यसपटक एसियाली खेलकुदमा पदक जित्न नसके पनि समूह चरणमा प्रभावशाली प्रदर्शन गरेको थियो। नेपालले टेस्ट राष्ट्र अफगानिस्तानलाई १२ वर्षपछि पराजित गर्दै पाँच विकेटको जित निकालेको थियो।
समूह चरणको अन्तिम खेलमा आयोजक जापानसँगको खेल भने वर्षाका कारण प्रभावित भएपछि नेपालले अंक बाँडेको थियो। समूह विजेताका रूपमा क्वार्टरफाइनलमा प्रवेश गरेको नेपालले अन्तिम आठमा श्रीलंकाको सामना गरेको थियो।
श्रीलंकाविरुद्धको क्वार्टरफाइनल खेल वर्षाका कारण प्रभावित भएपछि नेपाल प्रतियोगिताबाट बाहिरिएको हो। आईसीसी टी–२० वरियतामा नेपाल श्रीलंकाभन्दा पछाडि रहेकाले वर्षाका कारण खेल हुन नसकेपछि श्रीलंका क्वार्टरफाइनलबाट अघि बढेको थियो।
