.gif)
काठमाडौं - आईसीसी क्रिकेट विश्वकप लिग–२ अन्तर्गतको महत्त्वपूर्ण खेलमा नेपाल क्यानडासँग २४ रनले पराजित भएको छ ।
ओमानमा भएको खेलमा क्यानडाले दिएको २५७ रनको लक्ष्य पछ्याएको नेपाल २३२ रनमा अलआउट भएपछि हार बेहोर्न बाध्य भएको हो ।
यस हारसँगै लिग–२ को शीर्ष ६ मा रहेर विश्वकप छनोटको सम्भावना कायम राख्न नेपालमाथि दबाब बढेको छ । शीर्ष ६ भित्र अटाउन नेपालले अब अन्तिम खेलमा ओमानलाई हराउनुपर्नेछ ।
२५७ रनको लक्ष्य पछ्याउने क्रममा नेपालका लागि अर्जुन कुमालले सर्वाधिक ८७ रन बनाए । अन्य ब्याटरले ठूलो योगदान दिन नसक्दा नेपाल लक्ष्यसम्म पुग्न असफल भयो ।
आशिफ शेखले २०, इशान पाण्डेले २१, कप्तान रोहित पौडेलले १८ र दीपेन्द्रसिंह ऐरीले २७ रन बनाए । गुल्शन झाले २१ तथा करण केसीले १७ रनमा अविजित रहे ।
त्यसअघि टस जितेर पहिले ब्याटिङ गरेको क्यानडाले निर्धारित लक्ष्य प्रस्तुत गर्ने क्रममा युवराज शर्माको शतकीय इनिङ्सको मद्दत पाएको थियो । युवराजले १०५ रन बनाउँदै क्यानडालाई प्रतिस्पर्धात्मक योगफलसम्म पुर्याएका थिए ।
क्यानडाविरुद्धको हारले नेपालको लिग–२ यात्रा थप चुनौतीपूर्ण बनेको छ । अब नेपालले ओमानविरुद्धको अन्तिम खेल जित्दै शीर्ष ६ मा रहने सम्भावना जोगाउनुपर्नेछ ।
।
