काठमाडौं - एसीसी महिला प्रिमियर कप २०२६ अन्तर्गतको समूह चरणको अन्तिम खेलमा नेपालले आज हङकङसँग खेल्दैछ । 

मलेसियामा जारी खेल दिउँसो पौने १२ बजे शुरु हुनेछ । 

समूह ‘डी’ मा रहेका नेपाल र हङकङ दुवै क्वाटरफाइनलमा पुगिसकेका छन् ।

आजको खेलको नतिजाले समूह विजेता र उपविजेताको टुंगो लाग्नेछ । 

यसअघि पहिलो खेलमा नेपालले कतारलाई ८ विकेटले र दोस्रो खेलमा भुटानलाई ५१ रनले हराएको थियो ।

हङकङले पनि कतारलाई ८३ रनले र भुटानलाई १४ रनले हराएको थियो । कतार र भुटान समूह चरणबाट बाहिरिसकेका छन् । प्रतियोगितामा १८ देश सहभागी छन् ।

प्रिमियर कपमा सेमिफाइनल पुग्ने शीर्ष चार टोलीहरू एसिया कपका लागि छनोट हुनेछन् ।