काठमाडौं - भारतका विदेशसचिव हर्षवर्धन श्रृंगलाले दुई देशबीचको समस्या वार्ताद्वारा समाधान गर्नुपर्ने बताएका छन् ।

शुक्रबार बिहान द एसियन इन्स्टिच्युट अफ डिप्लोमेसी एन्ड इन्टरनेसनल अफयेर्सले आयोजना कार्यक्रममा बोल्दै श्रृंगलाले राष्ट्रिय सपना पूरा गर्न नेपाल र भारतलाई एक अर्काको आवश्यकता हुने भएकाले समस्या वार्ताद्वारा समाधान गर्नुपर्ने बताएका हुन् ।

'नेपाल र भारतको सम्बन्ध आत्मीय परम्परा, सिभिलाइजेसन र इतिहासले दुई देशका जनताबीच शक्तिशाली सम्बन्ध कायम गरेको छ । दुईवर्ष अगाडि मोदीको भ्रमणले पनि यो स्पष्ट पारिसकेको छ ।' श्रृंगलाले भने, 'हामीले भारतमा मात्र होइन परपरसम्म हेरेर सपना देखिरहेका छौं। हामी यो सपनालाई वास्तविकतामा बदल्न निरन्तर मेहनत गरिरहेका छौं र नेपालका मित्रहरूलाई हाम्रो यात्राको हिस्सा बनाउन चाहन्छौ ।'

उनले पछिल्ला केही वर्षमा नेपाल र भारतबीचको सम्बन्धमा उतारचढाव आएको बताउँदै बलियोरुपमा सँगै अघि बढ्नुपर्ने बताए ।

नेपाल र भारत दुवै देशका नयाँ पुस्ताको आकांक्षा अनुसार डिजिटल टेक्नोलोजीमा पछिल्ला वर्षमा विकासलाई आत्मसात् गर्दै दुई पक्षीय सहकार्यलाई विकास गर्दै लैजानुपर्ने उनको धारणा छ ।

उनले काठमाडौंमा आएपछि राष्ट्रपति विद्यादेवी भण्डारी, प्रधानमन्त्री केपी शर्मा ओली, परराष्ट्रमन्त्री प्रदीप ज्ञवालीसँग शिष्टाचार भेट गर्नुका साथै आफ्ना समकक्षी परराष्ट्रसचिव भरतराज पौड्यालसँग द्विपक्षीय वार्ता गरेका थिए।