काठमाडौं - फरवार्ड ग्याब्रिएल जेसस पेनाल्टीमा चुक्दा अन्तराष्ट्रिय मैत्रीपूर्ण फुटबल खेलमा ब्राजिल अर्जेन्टिनासँग पराजित भएको छ ।

शुक्रबार राति भएको मैत्रीपूर्ण खेलमा ब्राजिललाई १-० गोल अन्तरले पराजित गर्दै अर्जेन्टिनाले सुपरक्लासिको उपाधि जितेको हो । अर्जेन्टिनाको जितमा कप्तान लियोनल मेस्सीले एकमात्र निर्णायक गोल गरे ।

खेलको १३ औँ मिनेटमा मेस्सीले पेनाल्टीमार्फत गोल गरेको थिए । एलेक्स स्यान्ड्रोले मेस्सीलाई पेनाल्टी क्षेत्रभित्र लडाएपछि अर्जेन्टिनाले पेनाल्टी पाएको थियो । मेस्सीको पेनाल्टी प्रहार गोलरक्षक एलीसन बेकरले बचाए तर मेस्सीले रिबाउन्डमा गोल गरेका थिए ।

अर्जेन्टिनाले अग्रता लिनुभन्दा ३ मिनेट अगाडि ब्राजिलले पेनाल्टी अवसर खेर फालेको थियो । जेससलाई जर्मन पेजेलाले लडाएपछि रेफ्रीले पेनाल्टी दिएका थिए तर जेससको प्रहार पोस्टभन्दा बाहिर गएको थियो ।