इरानविरुद्ध अमेरिकी युद्धपोत र फौज तैनाथ

एजेन्सी - अमेरिकी राष्ट्रपति डोनाल्ड ट्रम्पले इरानलाई परमाणु कार्यक्रमसम्बन्धी नयाँ सम्झौताका लागि वार्ता गर्न अब धेरै समय बाँकी नरहेको चेतावनी दिएका छन् ।

खाडी क्षेत्रमा अमेरिकी सैन्य उपस्थिति क्रमशः बढ्दै गएको सन्दर्भमा ट्रम्पले ‘समय सकिँदै गएको’ भन्दै तेहरानमाथि दबाब तीव्र बनाएका हुन् ।

ट्रम्पले अमेरिकाको ठूलो नौसैनिक फौज इरानतर्फ ‘तीव्र गति, शक्ति, उत्साह र स्पष्ट उद्देश्यसहित’ अघि बढिरहेको दाबी गरेका छन्। उनले उक्त सैन्य परिचालनलाई ‘विशाल आर्माडा’को संज्ञा दिँदै आवश्यक परेमा बल प्रयोग गर्न अमेरिका तयार रहेको संकेत दिएका छन्।

यसको प्रत्यक्ष जवाफ दिँदै इरानका विदेशमन्त्री अब्बास अराघचीले देशका सशस्त्र बलहरू ‘औँला ट्रिगरमा राखेर’ स्थल वा समुद्रमार्गबाट हुने कुनै पनि आक्रमणको ‘तत्काल र शक्तिशाली’ जवाफ दिन पूर्ण रूपमा तयार रहेको बताएका छन्।

इरानले आफ्नो परमाणु कार्यक्रम पूर्ण रूपमा शान्तिपूर्ण रहेको दाबी गर्दै आएको छ। यद्यपि अमेरिका र उसका सहयोगी राष्ट्रहरूले इरानले गोप्य रूपमा परमाणु हतियार विकास गर्न खोजिरहेको आरोप लगाउँदै आएका छन्, जसलाई तेहरानले बारम्बार अस्वीकार गर्दै आएको छ।

ट्रम्पको पछिल्लो चेतावनी इरानभित्र चर्किएको आन्तरिक संकटको पृष्ठभूमिमा आएको हो। इरानी मुद्राको मूल्य तीव्र रूपमा घटेपछि सुरु भएका प्रदर्शनहरू क्रमशः धार्मिक नेतृत्वको वैधतामाथि नै प्रश्न उठ्ने गम्भीर संकटमा परिणत भएका छन्। ती प्रदर्शनमाथि भएको कठोर दमनका कारण अन्तर्राष्ट्रिय समुदायको ध्यान इरानतर्फ तानिएको छ।

प्रारम्भमा ट्रम्पले ‘मद्दत आउँदैछ’ भन्दै प्रदर्शनकारीहरूलाई समर्थन जनाए पनि पछि उनले भरपर्दो स्रोतबाट मृत्युदण्ड रोकिएको जानकारी पाएको दाबी गर्दै आफ्नो भनाइ संशोधन गरेका थिए।