प्रतिनिधिसभाको बैठक बस्दै, यस्ता छन् कार्यसूचि

काठमाडौं - प्रतिनिधिसभाको बैठक आज बस्ने भएको छ । दिउँसो १ बजेका लागि बोलाइएको बैठकमा विभिन्न विषयमा छलफल हुने कार्यसूची रहेको छ ।

आजको बैठकमा कृषि तथा पशुपञ्क्षी विकास मन्त्रालय र वन तथा वातावरण मन्त्रालयसँग सम्बन्धीत मौखिक प्रश्न सोध्ने र तिनको उत्तर दिने कार्यसूची रहेको छ । यस्तै आजको बैठकमा प्रतिनिधिसभाका सचिव गोपालनाथ योगीले ‘शिक्षा सम्बन्धी केही नेपाल ऐन संशोधन गर्ने विधेयक २०७५’ का सम्बन्धमा राष्ट्रिय सभाबाट सन्देश पनि टेबुल गर्ने कार्यसूची रहेको छ ।

यसैगरी आजको बैठकमा उद्योग, वाणिज्य तथा आपूर्ति मन्त्री मातृकाप्रसाद यादवले ‘उद्योग तथा वाणिज्य र श्रम तथा उपभोक्ता हित समितिको प्रतिवेदनसहितको औद्योगिक व्यवसाय विधेयक २०७५’ माथि छलफल गरियोस भनी प्रस्ताव प्रस्तुत गर्नेछन् ।

साथै ‘औद्योगिक व्यवसाय विधेयक २०७६’ लाई पारित गरियोस् भनी प्रस्ताव प्रस्तुत गर्ने कार्यसूची रहेको छ ।