काठमाडौं - क्रिस्टियानो रोनाल्डो प्रेरित इटालियन महारथि युभेन्ट्स च्याम्पियन्स लिग फुटबलको नकआउट चरणमा प्रवेश गरेको छ ।

बुधबार राति भएको समूह ‘डी’ को खेलमा रसियन क्लब लोकोमोटिभ मस्कोलाई २–१ गोलले हराउँदै युभेन्ट्स नकआउट चरणमा पुगेको हो ।

युभेन्ट्सको जितमा डगलस कोस्टा नायक बने । उनले इन्जुरी समयमा गोल गर्दै युभेन्ट्सलाई जिताएका थिए ।यसअघि युभेन्ट्सले खेलको चौथो मिनेटमै एरोन राम्सेको गोलबाट सुरुवाती अग्रता लिएको थियो । राम्सेले रोनाल्डोको फ्रिकिक पासमा गोल गरेका थिए ।

१२औं मिनेटमा मस्कोका अलेक्सी मिरान्चुकले गोल गर्दै खेललाई बराबरीमा ल्याए । इन्जुरी समयमा डगलस कोस्टाले गोल गर्दै युभेन्ट्सको जित पक्का बनाए । जितसँगै युभेन्ट्सले चार खेलबाट १० अंक बनाएको छ । युभेन्ट्स शीर्ष स्थानमा छ । तीन अंक बनाएको मस्को अन्तिममा छ ।

यही समूहको अर्को खेलमा स्पेनिस क्लब एट्लेटिको म्याड्रिड जर्मन क्लब बायर लिभरकुसेनसँग २–१ गोलले पराजित भएको छ । लिभरकुसेनले एट्लेटिकोका थोमसको आत्मघाती गोलबाट ४१औं मिनेटमा अग्रता लिएको थियो । ५५औं मिनेटमा केभिन भोलान्डले गोल गर्दै लिभरकुसेनको अग्रता दोब्बर बनाए ।

त्यसपछि एट्लेटिकोका अल्भरो मोराटाले दोस्रो हाफको इन्जुरी समयमा एक गोल गरेपनि टोलीको हार टार्न सकेनन् । हारसँगै सात अंक बनाएको एट्लेटिको दोस्रो स्थानमा छ । तीन अंक बनाएको लिभरकुसेन तेस्रो स्थानमा छ ।